Ғылымға ғұмыр арнаған әулетке – жоғары құрмет
Қазақстанда ғылым саласына өлшеусіз үлес қосып жүрген ғалымдарға мемлекет тарапынан жоғары құрмет көрсетілді. Президент жарлығымен Р.Б. Сүлейменов атындағы Шығыстану институтының Бас директоры, көрнекті шығыстанушы Дүкен Мәсімханұлы ІІІ дәрежелі «Барыс» орденімен марапатталды. Ал осы салада табысты еңбек етіп жүрген Айнура Әбиденқызына «Қазақстанның еңбек сіңірген қайраткері» құрметті атағы берілді.
Бұл – ғылым жолын таңдаған бір әулеттің табанды еңбегі мен ізденісіне берілген лайықты баға. Шығыстану саласында бірге еңбек етіп келе жатқан бұл отбасы ғылымдағы сабақтастық пен білімге деген адалдықтың жарқын үлгісіне айналып отыр.
Айта кетейік, 24KZ телеарнасы осы отбасы туралы арнайы сюжет әзірлеп, олардың ғылыми қызметі мен жетістіктерін кеңінен көрсетті. Сюжетте ғалымдардың зерттеу жұмыстары, жас ұрпаққа беріп жүрген білімі және ғылымдағы орны ерекше атап өтілді.
Мамандардың пікірінше, мұндай ғылыми әулеттер – елдің зияткерлік әлеуетін нығайтатын маңызды күш. Ғылымға көрсетілген құрмет – болашаққа бағытталған берік қадам.
