ҚР ҒЖБМ ҒК Р.Б. Сүлейменов атындағы Шығыстану Институтында атқарылып жатқан ғылыми жобаның күнтізбелік жоспары бойынша Институттың бас директоры, филол.ғ.д., профессор Д. Мәсімханұлы және Институттың бас ғылыми қызметкері, т.ғ.д., профессор Н. Мұқаметханұлы Ресей астанасы Мәскеу қаласында болды.
Ғылыми іс-сапар аясында ғалымдар Мәскеу қаласында орналасқан Ресей Федерациясы ҰҒА Шығыстану институтының директоры, т.ғ.д., профессор А.К. Аликберов, Мәскеу мемлекеттік университеті Азия-Африка елдері институтының директоры, т.ғ.д., профессор А.А. Маслов, сондай-ақ РФ ҰҒА вице-президенті, РФ ҰҒА академигі Н.А. Макаровпен кездесу өткізді.
Кездесуде екі жақты әріптестік байланыстарды нығайтуға қатысты көптеген мәселелер талқыланды. Сондай-ақ, мекемелер шығыстану ғылымының өзекті мәселелері бойынша бірлесіп ғылыми жобалар әзірлеу, бірлесіп ғылыми кадрлар дайындау, бірлесіп ғылыми конференциялар өткізу, бірлесіп мерзімді ғылыми басылымдар шығару, ғылыми кадрлардың тағылымдамасын жүзеге асыру мәселелері бойынша уағдаластыққа қол жеткізілді.
